Dung do tarbege hamu soara songon soara ni jolma di borngin ni ari alai  tarida halakna ? Uju i taon 1978-1982 margantima jadwal marguru ende ni Naposobulung di gareja HKBP Sosorgonting-Doloksanggul, salelengon borngin do jom 20.00-22.00 wib ganup ari Kamis dohot Sabtu gabe muba tu jom 16.00-18.00 wib. Topetma antong tingki i ai partani do sude personil koor naposo i nang dirigen/guruna, termasuk ma si Mael anggotana ima sahalak doli-doli na ringgas jala parbarani. Umbahen na marganti jadwal marguru ende i, na marpangidoan do angka anggota koor nabarbaju asa botari ma nian marguru ende, ala mabiar nasida molo mardalan borngin, ai jot-jot ninna nasida diambat binatang na disoropi begu.

          Penasaranma si Mael songon dia do ulaning rumang ni pangambat i ? Atik na marsidalian do namarbaju i, tupa ra asa unang targanggu do borngin angka namarbaju i manjalo haroro ni doli-doli pangaririt (partandang). Manang atik na adong do ulaning dakdanak na juit pabiar-biarhon angka namarbajui paimbar-imbar rupa tompa binatang…..Ahh painte dah ingkon maila ibana annon molo dapothu ninna si Mael dirohana.

          Disungkun ibana ma angka donganna naposoi mang-identifikasi masalah, alus nasida binatang do na sai olo ambat di jolo ni nasida di tongan dalan i jala jugul dang olo meret nangpe didanggur jala huhut sasahali olo mengkel binatang i songon jolma na-martata….ah gabe dohot si Mael longang, dipaboa muse do lokasi kejadian i tu ibana.

          Disungkun si Maelma bapana, “sulambak do i.” ninna bapana patoranghon. “Di luat na asing didok goarna sigulambak, ima sejenis musang liar, na digoari ‘bungaihur’, ima jantan (alpha male) na matua, naung margapil-gapil pira tunggalna jala nunga disoropi begu,” ninna bapa. Songon pidong beo do sulambak i, sai olo manangi-nangi hata ni jolma jala disuba-suba mandokkon pasuman hata i, alai dang na diantusi Sulambak hata na nidokna. Ianggo na humatop boi ditiru ima suara ni poso-poso na tangis dohot soara ni engkel ni jolma. “Manang andiganpe mardalan borngin ho, molo dibege ho songon soara ni poso-poso na tangis manang songon soara ni jolma na-martata, di ladang manang na di ramba bope jonok tu jabu, pamanatma Sulambak do i,” ninna bapana muse manambai hatorangan.

          Agoi amang tabona i molo dapothu anak ni bungaihur tunggal, piaroonma sampe balga sahat tu na dewasa, dung jadi sulambak na jinak, pupu ma niputar tape recorder di lambungna patubegehon vokal ni si Julio Iglesias di endena “When I Need You,” sintap ni naboi denggan diendehon sulambak i. “Dung tammat sulambak i marende nga boi bahenon pertunjukan kelas kampung, tiketna 5 ribu per org, ninna si Mael tu bapana.” Mengkel suping ma bapakna.

           Ia si Mael ima jolma na so olo mabiar, tu begu aha pe taho agiape tu binatang. “Gariada begu do mabiar tu au,” ninna ibana do jotjot tahe….hehehhe.

          Laho ma si Mael sahalakna mengintai jam pitu borngin tu inganan, ima dalan kudi di dia somalna Sulambak mangambat. Goar ni inganan i gadong na mora. Diboan ma senter si-lima batu, marisi batere eveready naimbaru, ai so adong dope listrik hatiha i. Dung sahat ibana dipamanatma humaliang, hape so adong humutik manang ahape. Sai disenteri tu ramba-ramba i, dang adong na marderes.

          Na sopanagaman tompu ma tarbege ibana songon soara ni baoa na magodang sian punsu ni hau di lombang-lombang, ninna “Oi painte jo boh.” Mardisir imbulu horina sude. Sangkidop mata pintor refleks disenter ibana tu ginjang tarida ma dua mata riong-riong marhillong ala pantulan sinondang ni senter silima batu i. “Toho do hape, dang nipi on,” ninna rohana. Patut do mabiar angka namarbaju i mardalan borngin…..agaiayabach.”

          Dipatakkas disenter nga mijur be Sulambak i ro jumonok. Tompana bungaihur (lowak kopi), na songon musang i rupana. Balgana nasa biang na martimbang 15-20 kg. Keleurna birong kecoklatan, ihurna ganjang bontar di pudi. “Hussss….huss,” ninna si Mael. Laos so olo do antong Sulambak i meret. So do imana hira namangalo. “Husss…,” ninna muse hape lam jonok, huhut mulakhulak mandok ‘oi painte jo boh,’ jala holan i do hatana.

          Sai galak senter on patontang mata marsijonggoran dohot Sulambak i. Sai marpikkirma si Mael, boasa dang adong jolma mamolus ulaning? Hape nunga lobi 20 menit ibana di dalan kuli i, kareta dohot mobil pe dang adong mamolus, ai na tudia do jolma sude? Aut ro angka dongan nga boi dikepung Sulambak on ninna rohana. “Ah tangkuponku nama on. Alai behama carana ateh? Olo tahe hupajonok ma tu Sulambak on dung adong hira 2 meter nari mangalumpat ma ahu manangkup ihur na, hupiu, huordong songon ambalang di alogo niembaphon tu tano alai jolo nilotak ma dohot senter on,” ninna rohana dibagasan.

          “Woi binatang do ho, molo dapot ho allangon do ho gabe jagal, molo so lao ho saonari tangkuponku do ho,” ninna si Mael ma tu Sulambak i, hape tong sai dijugulhon nol-nol dijolona. Ambil ancang-ancang lam pinajonok, pasang kuda-kuda kumpulkan tenaga di kaki……lompat, antuk dohot senter, anahon ihurna naeng manangkup.

          Hape sigop do mangangkat Sulambak i tu ramba na ditopi ni dalan i, jala sai so ma disi dang olo meret.

          Bobonosan ma si Mael. Ditorushon ma mardalan manuju tu toruan, alai sai tong do mangihut-ihut Sulambak i sian pudi huhut sai dijouhon gogo ‘oi painte jo boh’. Aut adong hian henpon nga boi di-rekam soarana i ateh? Dung pe jonok tu huta jala tarbege soara ni asu mangorong, disi pe manirpang Sulambak i tu ramba dang mangihut-ihut be.

          Andorang so sahat si Mael tu huta na di toruan, nunga tarida torop jolma di lapo ni Gurubirong marrunggu, huhut manatap-natap dompak dolok songon na paimahon atik adong jolma na ro. Dung di ida nasida si Mael, rongom ma nasida ro huhut disungkunbema :

          Natorop: “Ai dang diambat Sulambak i hamu lae?”